Terceiro posto para Pablo Carou na capital do Lérez

Pablo Carou, taekuondista do Maniotas de Noia, conseguiu o bronce no torneo Internacional Cidade de Pontevedra. O noiés enfrontouse nas series de semifinais con Pedro Povoa, un portugués que na Olimpíada de Pequín obtivo un diploma olímpico.

Carou dominou todo o combate cunha diferenza de tres puntos e só nos últimos segundos do terceiro asalto o luso, cun par de accións, deu a volta ao marcador. O propio deportista noiés explicou os motivos do cambio de situación: «Só me faltou creermo, crer que lle podía gañar a todo un diploma olímpico». Pablo Carou afrontará o próximo día 27 o Open de París.